مو من عوايدي أكتب في الويك إند .. لكن النوم مخاصمني الليله .. ويمكن كله ليله هذي حالتي ..

ما اقدر انام بسرعة من سنين!

ماني عارف السبب .. اتقلب كل ليله .. اسلي نفسي بقراءه كتاب أو أي شي بس على شان أدوخ وأنام وأرتاح من تعب الشغل والمشاغل ..

الليله بالذات تذكرت ايام الدراسة في الجامعة .. أيام حلوة بكل معنى الكلمة .. ودي ترجع بدون الأمتحانات!

تذكرت كل شي عن ذيك الايام وقعدت احسب غلطاتي!!

 يااااااااااااااااه ولله في ناس ما قدرتهم عدل .. وناس قدرتهم وهم مو كفو .. ما عرفت هالحقيقة إلا بعد فوات الأوان .. تخرجت وطافت سنين ومانسيت ..

في ناس كانوا مثل اخواني واحبابي وأكثر ..

نطلع مع بعض .. نداوم مع بعض .. ندرس مع بعض .. نسافر مع بعض .. نروح شاليهنا مع بعض .. نقعد بدوانية وحده .. نروح الدواوين مع بعض .. وبينا معرفة وعشرة ومحبة ومعزة ..

وبعد هالسنين نشوف بعض وكأننا ما نعرف بعض .. وحتى السلام صار لتأديه الواجب فقط .. هذا اذا صار سلام من الاساس!

شنو إلي غيرنا ؟!

الدنيا والأيام إلي أشغلتنا؟! ولله الموضوع طبيعي وأنا مسوي من الحبه قبه!

أمس مريت محكمة الاحمدي .. في مواقف السيارات شفت محمد وهو واحد من إلي كان بالنسبة لي أكثر من أخو وصديق ..

من كثر ما كنا ربع الناس تلخط بأسامينا وكانوا ينادوني محمد وينادونه عبدالحميد ..

دخلنا المبنى وركبنا الاصنصير مع بعض وهني ما قدرت امسك نفسي .. قلت له شخبارك يا محمد؟! طالعني وقالي بدون لا يطالعني أنا زين؟! قلت الحمدالله انك زين .. إلتفت علي وقالي شيايبك هني؟ قلت له عندي شغل بالدور الرابع .. قال أوكي يالله فرصة سعيدة! ونزل الدور الثالث وراح!

فرصة سعيدة .. هذا إلي لله قدره عليه ؟؟ ولله جست القلوب وصارت أصلب من الصخر ..

خلصت شغلي ورفعت النقال على صديقنا الثالث سعود .. وقلت له شصار .. قال لي عادي لا تحط في بالك وقالي بأني صاير وايد حساس هالفترة على غير العادة! ما يدري بمعاناتي كل ليله وكأني أحاسب نفسي والنوم ما اذوقه الا بطلعه الروح!