أحداث كثر إلي باقي من شعر راسي صارت في الكويت في الفترة الماضية ،، ومالي مزاج أتكلم بالسياسة ولا الاستجوابات ولا الساقط الجويهل ولا مسلم البراك ولا الفتنة الطائفية وإبداعات الدويسان ولا مقلب مباراة برشلونة وكاظمة !!

مقهور من لجنة الإزالة .. ماني عارف شيبون بالضبط !! خل أقولكم شصار ،،

قالوا شيل الديوانية إلى في الحديقة ،، شلناها وحطينا بدالها نخلة ،، قالوا شيل سور الحديد ،، شلناه وحطينا بداله سور من الزرع ،، قالوا شيل ألعاب اليهال ،، شلناهم وحطينا أحواض ورد ،، قالوا صغر سور الزرع وخل ارتفاعه 30 سنتيمتر ،، صغرناااااه ،، الحين يقولون شيل النخلة وأحواض الرزع والسور بو 30 سنتيمتر!!

طيب ما كان من الأول يا جماعة!؟ ليش تخلوني اخسر على هالسبع امتار مرة ومرتين وثلاث ؟؟

ذاك اليوم كنت رايح ملجه احد الاقارب ،، ولا واحد من الاهل مع اللجنة ،، كلمته وقلت له اذا عندكم ملاحظات هاتوها مرة وحدة مو بالاقساط ؟ قال حنا نخدم الوطن ونطبق القانون ،، قلت له ،، هو مو قانون أصلاً ،، هو قرار وأنتوا مخزبقين منتوا عارفين شتسوون بعمركم وجار أكيد بتقولي شيل السبيل الموجود بالحديقة ،، طالعني وقال إي والله السبيل مخالف بعد شلون طافتنا !!

قلته الشره علي انا اكلمك !!

كل اسبوع الكاركترات عند باب البيت وخرعين الناس ،، ويا ريت لما يهدمون شي يشيلون الانقاض والوصخ !! لا يخلونه على شان تشوفه وتنبط جبدك ويرتفع ضغطك وتموت قهر !!

حاطين حالهم حال هالجم متر وهادين تجاوزات الشويخ الصناعية والمصانع إلى تسبب التلوث وحاطين دوبهم دوبنا.

حسبي الله عليكم !!

هذا الموضوع كتب في 23 ديسمبر 2009 في الساعة 11:36 pm ومصنف بهذه التصنيفات: غير مصنف. يمكنك متابعة التعليقات على هذا الموضوع عن طريق ملف الخلاصات RSS 2.0. Yيمكنك كتابة تعليق، لكن لا يمكن التعقيب على الموضوع في المواقع الأخرى.